ဒူ
တော်ရုံသဘောပေါက်မလွဲ။ တုံးအ။ အူကြောင်ကြောင်နိုင်။
မင်းကတော့ ဒူပကွာ။ ဟိုက မင်းကို ဒီလောက် အထာပေးနေတာကို။
သံပတ်
မိမိအတွက် အကျိုးအမြတ်မရှိပဲ တခြားတစ်ယောက် အတွက် လိုက်လံ လုပ်ဆောင်ပေးနေရသည်။ သံပတ်ကားလေးများကို နောက်သို့ဆွဲလိုက်သောအခါ ရှေ့သို့ သွားရသည့် သဘောဖြစ်သည်။
ငါနဲ့ ချိန်းထားပြီးတော့ လက်ဘက်ရည် ဆိုင်မှာ ဘာလာလုပ်နေတာတုန်း။ သံပါတ် မိတယ်ကွာ။
နေလှန်း
တစ်စုံတစ်ဦးက သွားချင်ရာသွားပြီး မိမိကို စောင့်ခိုင်းနေခြင်းဖြစ်သည်။ ငါးခြောက် ထမင်းကြမ်း အစရှိသည်တို့ကို နေလှန်း ထားသည့် သဘောနှင့် တူတူ ပင်ဖြစ်သည်။
သားကြီး မင်း ၄ နာရီ အရောက်လာခဲ့မယ်ဆို။ အခုပဲ ၆ နာရီထိုးတော့မယ်။ ရေလည် နေလှန်းတယ်ကွာ။
ဘောက်ချာစုတ်/ဖြည်
ပြဿနာကို ထိပ်တိုက်ရှင်းသည်။ အကြောင်းကိစ္စတစ်ခုအား ဖြေရှင်းသည်။ စီးပွားရေးလုပ်ငန်းများတွင် အရောင်းအဝယ်ပြုလုပ်ခြင်း စာရင်းရှင်းခြင်းများတွင် အသုံးပြုကြသော ဘောက်ချာ(voucher) စာအုပ်များကိုအစွဲပြုကာ ပြောကြခြင်းဖြစ်သည်။
၁။ ဒီကောင် ငါ့ကို game ဆိုင်မှာ အချင်းချင်းဖြစ်ပြီး ပလိန်းကြီးလွှတ်ဆဲနေတယ် ... အေး ပြန်ရင်တော့ အဲ့ကိစ္စ ဘောက်ချာဖြည်မယ် ။ ၂။ အကြွေးမပေးဘဲ ဒီကောင် အရူးကွက်နင်းနေတာ ကြာပြီကွာ ... ဒီလကုန်တော့ ဒီကောင်နဲ့ ဘောက်ချာစုတ်မှ ဖြစ်တော့မယ် ။
လွတ်စကွတ်
ပုံမှန် အသိစိတ်လွတ်၍ ကြောင်တောင်တောင်ဖြစ်နေသည်။ ပလပ်ကျွတ်သည်။ လူမှန်းသူမှန်း မသိမူးသည့်အခါတွင်လည်း သုံးသည်။
၁။ တစ်ညလုံး မအိပ်ဘဲ ဂိမ်းဆော့လိုက်တာ အခုမနက်ကျ လူက လွတ်စကွတ်တွေ ဖြစ်နေတယ်... ၂။ သူငယ်ချင်း ဖြစ်ရဲ့လား.. ဒီအရက်က အရမ်းပြင်းတယ်နော် လွတ်စကွတ်တွေ ဖြစ်သွားမယ် ... သိပ်မသောက်နဲ့
ကျွတ်ကျဲ
ကြောက်လန့်ခြင်း။ သရဲဘောကြောင်ခြင်း။ သွေးမရှိခြင်း။
မင်းလုပ်တုန်းကလုပ်ပြီး အခုမှလာ ကျွတ်ကျဲ ပြမနေနဲ့။
လစ်
အူကြောင်ကြောင် စိတ်ကစဥ့်ကလျား စဉ်းစာဉာဏ် ပျောက်နေချိန်တွင် သုံးသည်
အဲ့ကောင် လစ်ပြီး လျှောက်ပြောနေပြီ
